10個iPhone 6s跪求改進PK位... 你同意吧?

iPhone每年更新，推新功能同規格係基本，嚟到iPhone 6s又繼續做宇宙最強，兼好炒得。之不過，iPhone仍然有好多結構性缺點，甚至先天性由第1代到而家都冇乜點改良，呢10個跪求iPhone改進PK位，部分嚟到6s都發現存在，希望可以認真研究下。 text-史提芬 photo-網上圖片 1.電量大縮水 早前有網民眼利睇到宣傳片6s同6s Plus嘅電池容量，分別傳為1,715mAh同2,750mAh，比起6同6 Plus下跌足足5.3%同5.5%嘅電量，相信為嘅都係增加空間放更多零件，另一解釋係iOS 9慳電咗。但始終電量少咗，要充電嘅次數就變得更快。雖然預計iPhone 6s嘅電量控制會有改善，但電量少咗，手電續航力的確係大家關注嘅問題。 2.16GB容量唔夠使 拍片用4K，影相去到1,200萬像素，再加埋一大堆遊戲同專用Apps，重要未計iOS 9嘅容量，16GB嘅手電又點會夠用。就以用16GB嘅6s拍4K片為例，外國網站就計到最多拍到30多分鐘，成部機就會迫爆。就算要自用，都唔好買16GB囉。 3.拍到4K片 睇唔到4K? 唔少Android機已經配備4K拍片功能，唔少有埋4K螢幕，做到超高清輸出。睇番iPhone 6s嘅螢幕解像度同6差唔多，重係1,334×750像素，就連1,920×1,080解像度都未到。拍到4K片想睇番，惟有轉去4K電視睇。 神仙級餐蛋丁點整？煮家男人同官方煮法大比併！ 4.鏡頭凸出易刮花 iPhone 6鏡頭嘅凸出設計，唔少用家反映比較易整花。同時凸出嘅鏡頭位外形又怪同時唔易保護，所以建議Apple改善。去到6s重係一模一樣，Apple可能要考慮iPhone 7推出時大改下。 5.單喇趴出聲 市面好多手電已經有多聲道音效播放，但6s仍然只配備1個喇叭位出聲，對於唔用耳機時播放片段，聲音的確唔夠力水，就連iPad Pro都支援4個喇叭，6s重未有的確可惜。   6.外形冇大變 每次發布會，新iPhone外形上都有轉變。但去到6s，外形同之前6幾乎一樣，而且重量加重之餘，厚度又增加咗。雖然話為防止機身彎曲而改良。不過對於用家追求手電更薄更輕，可以再有進步空間。 7.部機唔濕得水 手電咁隨身嘅物品，成日攞出街周圍用，達到防水防塵標準對用家絕對有好處。而且部分手電已經有唔同級別IP防水認證，就算鬆手跌落水都唔怕。雖然網上唔少測試都話iPhone有一定防水性。但咁多年都未達到IP國際防水認證標準，大家用機惟有小心啲。 神仙級餐蛋丁點整？煮家男人同官方煮法大比併！ 8.未能支援Apple Pencil iPad Pro有觸控筆Apple Pencil，全面提升觸控同手寫體驗，能夠成功吸引唔少專業用家過檔Apple。不過作為大芒手電6s Plus就未能夠支援觸控筆Apple Pencil，想用筆喺手電寫note，暫時只可以買第三方配件。 9.Lightning線易屈爆 Apple自從改用Lightning插口，必定會附送原廠Lightning線。但條線嘅壽命極麻麻。因為條線頂端位最易受壓損壞，當用家成日插iPhone充電，無可避免要屈到條線，變相外殼極易整壞。就連同事都有屈爆線嘅經驗，難怪副廠Lightning線咁好賣。 10.Apple預載App浪費容量 iOS本身跟機有一大堆預載Apps，唔用時的確霸住晒容量。特別6s最細得16GB，容量一定要慳啲用。可惜Apple從未加入過移除預載App功能， 只能夠眼白白睇住預載Apps唔用浪費位置。不過最近Tim Cook提到已經研究1個方法等用家可以移除部分Apps，唔知iPhone 7有冇機會見到呢個新功能。

---

更多詳情: http://www.appletrade.net/10%e5%80%8biphone-6s%e8%b7%aa%e6%b1%82%e6%94%b9%e9%80%b2pk%e4%bd%8d-%e4%bd%a0%e5%90%8c%e6%84%8f%e5%90%a7/