【玩機情報】iPhone 6 回收價受壓、S6 Edge 減價避 iPhone 6s？

張貼者： Unknown 於晚上10:06 沒有留言

Apple 終於係早幾日正式公佈咗最新一代 iPhone 6s，之前傳言全部證實正確，實在悶得唔識講，不過大家都係會炒埋一份㗎啦？6s 話咁明今日星期六已經有得訂，聽聞訂到 5 點幾都仲一路有貨？在下即刻踢落場睇睇，睇下上一代 iPhone 6 回收價有乜變化，等大家放機前，荷包有個心理準備。

雖然回收價跌就預咗㗎啦，不過其實又無預期跌得咁多，因為大連鎖店個邊 iPhone 6 同 6 Plus 係早兩個星期已經開始減價散貨的關係，易手機回收價早就已經跌咗一截。不過若果呢期仲唔走的話，到 iPhone 6s 正式到貨恐怕個價仲慘不忍睹，因為聽聞 6s 真係貨源充足，恐怕大貨到炒價未必有想像中咁勁。

▲ 先達裡面唔少鋪頭仲係標緊舊價，不過一問之下 iPhone 6 回收價已經唔見咗一截。

▲ 其實早兩星期大鋪將 iPhone 6 同 6 Plus 減價，回收價已經低咗唔少。

今日 iPhone 6 最新回收價，16GB 為 $3,5xx、64GB 為 $4,0xx，而 128GB 就係 $4,1xx 到 $4,2xx 之間；至於 iPhone 6 Plus 的回收價 16GB 為 $3,8xx、64GB 為 $4,2xx，而 128GB 就係 $4,3xx 到 $4,4xx 之間。當然唔同顏色機身，個價都有少少唔同，金色機自然再貴多兩三舊。

S6 Edge 又再減

除了 iPhone 6 系的回收價下跌之外，估唔到大連鎖店減完無耐的 Samsung Galaxy S6 Edge，咁快又再減多轉。早輪 Galaxy Note 5 同埋 S6 Edge+ 出之前，S6 Edge 先至減完一輪，點知 iPhone 6s 一公佈，S6 Edge 又再減多次，32GB 版本最新售價係 $5,698，減咗三百唔算好多，不過 64GB 就由 $6,998 減到 $6,498，算係跌得比較急，唔知會唔會令大家改變主意，唔通 6s 呢？

▲ 估唔到 Samsung 都要避一避 iPhone 6s 風頭，將 S6 Edge 一減再減。

除咗 Galaxy S6 Edge 之外，就連 Galaxy Tab S2 都開始減價，唔知係唔係怕咗 iPad mini 4 同埋 iPad Pro 呢？不過今轉減價主要係深水埗腦場的細鋪，8 吋與及 9.7 吋的 LTE 版 Tab S2 價錢只不過係 $3,660 同埋 $4,360，比起大鋪平咗唔少。

▲ 深水埗細鋪率先將 Galaxy Tab S2 減價，比大鋪抵玩好多。

Xperia M4 減價讓路

Sony 的中價位準機王 Xperia M5 Dual 呢幾日正式派貨，呢部機粒 Helio 處理器唔係話真係弱過 Snapdragon 810 好多，但就無咗過熱問題，加上係防水的關係，唔少玩機的朋友都非常睇好。新機一出，上一代 M4 Aqua 自不然要減價走貨。大連鎖店由原本 $2,498 減到 $2,198，唔係話好多，但都多過 9 折，以防水機嚟講係一個抵玩的選擇。