iPhone 6s 用家升級必讀 舊機資料完整備份瞬間轉移

iPhone 6s / 6s Plus 將於 9 月 25 日開始到貨，如果 ezone.hk 舊機果粉打算取了新機後，真係咁「神」唔賣俾收機佬而堅持拆封自用的話，以下報道必讀，教你如何把舊 iPhone 資料完整備份，迅間轉移至 iPhone 6s / 6s Plus！ 做備份唔使等新機到，現在就可以先做妥 backup，教你 3 招備份大法；自己資料自己 up，唔怕洩密頭耷耷；新機一到，即可迅間資料轉移，完成升級，嘩！ 【01】：iTunes 《iTunes》可以為 iOS 裝置做備份，你唔是唔知呀嘛？不論 ezone.hk 果粉使用 Windows 或 MacOS，只要將 iPhone 連接至電腦端，然後按「立即備份」，《iTunes》便會把手機資料好好保存，留待換上 iPhone 6s / 6s Plus 後，按「回復備份」就能將舊機資料轉移，就係咁簡單！ 【02】：iCloud iCloud 是蘋果於 2011 年推出的雲端儲存和應用服務，為用家提供音樂、Apps、相片同步，尋找手機以及無線資料備份等。如果 ezone.hk 果粉堅驚 iCloud 會像從前流出荷李活明星艷照私隱坦蕩蕩，iCloud 容許用家手動選擇備份內容，若不想重要資料外洩，咁咪唔好剔選囉，就係咁簡單。 溫提，iCloud 好在可以無線備份，惟備份速度與資料轉移至 iPhone 6s / 6s Plus 的速度也比使用 iTunes 方法慢。 【03】：iTools 著名手機管理工具《iTools》，兼容《Android》與《iOS》平台，並因應手機系統特性，提供一鍵或個別內容備份，操作具有彈性。 在 Apps 管理上，《iTools》可選擇備份單一程式或完整資料，可為《Whatsapp》、《KKBox》等載有通訊或音樂內容的程式作完整備份。 【extra】：iOS9 老外建議，舊機在備份前先升級 iOS9 為佳。老外話 iOS9 正式版將於 9 月 16 日推出；iPhone 4s 或以上型號支援 iOS9。 此外，做好備份後，如繼續使用舊機，咁 ezone.hk 粉絲就要留意，在你把資料轉移到新 iPhone 前一剎，建議再做一次舊 iPhone 備份。 最後，假設 ezone.hk 粉絲的舊 iPhone 已升級 iOS9，你可以到「設定」-「一般」-「重置」-「清除所有內容和設定」，移除所有資料後，可以 trade 咗佢、賣咗佢、放售俾收機佬、二手回收、餽贈親友、立個墓碑葬咗佢…你想點就點！